Thursday, February 08, 2007

الاخوان المسلمون.. والاقباط المتحدون ..


التسامح الديني والمذهبي سمه اساسية فى المجتمع المصري
فهناك مسلمون فى بعض الدول يتقاتلون كما حدث بين السنة والشيعه ..
وهناك مسيحيين فى بعض الدول يتقاتلون كما حدث بين الكاثوليك والبروتستنت
وكل ذلك نتيجة من الفتن والاهداف السياسية والعنصرية
والاحقاد التوظيفية للدين والعقائد



رغم ان العقائد الدينية هي التي تقوي النفس
وتلهمها للعمل الطيب وحب الخير ونبذ الكراهية والتفكك والتشرذم
وتعلى من قدر البشر ولا خضوع ولا عبودية لغير الله بينهم

هذا هو اساس كل الاديان السماوية التى انزلها الله لتكون رحمة للعالمين
فكانت رسالة المسيح علية السلام هي المحبة والسلام بين البشر
وكانت رسالة محمد علية السلام هي العدالة والمساواة بين البشر

هذا هو شان تعاليم الاديان العظيمة ولكن الغلاه من اى طرف
ينقدون ميثاق الله الذي قال من قتل نفس بغير نفس او فساد فى الارض
فكانما قتل الناس جميعا ومن احياها فكانما احيا الناس جميعا
وساوي الله بين الناس فلا فضل لذكر على انثي
ولا لعربي على اعجمي الا بالتقوي والعمل الصالح

يا أيها الناس انا خلقناكم من ذكر وانثى "
وجعلناكم شعوبا وقبائل لتعارفوا ان اكرمكم عند الله اتقاكم"
(الحجرات/13).

ولكن من يدعون الاسلام من بعض من اشتروا بآيات الله ثمن
لتطويع الناس وتحقيق مكاسب سياسية ومالية وعنصرية
ونصبوا انفسهم اوصياء على الاخرين حتي على قلوبهم
ودينهم وايمانهم رغم ان القرآن الكريم يقول
"فلا تزكوا انفسكم هو اعلم بمن اتقى "
(النجم:32)
هذا ما يقولة الله فى قرآنه فهل هذا ما يفعلة الاخوان المسلمين؟

ام انهم فيفتون بغير علم ويبدلون كلمات الله واوامرة فى قرآنة
فيثيرون البغضاء والاحقاد بين الناس ويسيسون الدين

ويزرعون الفتن ومن زرع فتنة لن يحصد الا النار ..
فهم يزكون انفسهم ويتعالون بها على خلق الله ؟
!! وهذا هو حالهم فهم يتاسلمون ليتجملون ولمكاسبهم يحصلون
باستغلال حب الناس التلقائي والفطري للايمان
ومستعده لتفنيد دعاويهم كاملة وطرحها على القرآن
وهو الفيصل لنعرف هل بالفعل الاخوان المسلمين مسلمين ؟

انهم ينسبون افعالهم للدين وهو برئ منهم
عبر قطع النصوص عن سياقها
وسببها وماهيتها ويتبعون اسلوب القص واللصق
والترقيع فى النصوص القرآنية الكريمة

وعلى الجانب الآخر يمارس من سموا انفسهم بالاقباط المتحدون
وبالتعاون مع بعض اقباط المهجر رد فعل استباقي وإيقاظ الشرارة الثانية..
ليس بالطعن فى اهداف هؤلاء المتأسلمين وتشكيك فى غاياتهم الشخصية

ولكن بالطعن فى الدين الاسلامي نفسة و يلبسونه
ما يحاول المتأسلمون ارتداءة وهذا هي السطحية فى الفهم
باغراض ودعاوى الاخرين او مس ذلك
ارتياح فى انفسهم ان يلصقوة بالمسلمين

فنشروا مقالاتهم على كل المواقع والمدونات واحاديثم فى الفضائيات
يسبون فى الاسلام والمسلمين ونبيهم ودينهم وعقيدتهم !!

ويباركون حرب السب والكراهية التى اطلقها الادينين والملحدين
الاستحقروا كل الاديان وجادلوا فى الله بغير علم
وكأن هؤلاء عندهم اهدي من الذين آمنوا سبيلا !!!!!!!!

واري ان الاقباط المتحدون لا يختلفون عن الاخوان المسلمين فى اهدافهم ..
فالاخوان يريدون تحقيق مكاسب سياسية داخلية بتطويع الدين وتزييفة

والاقباط المتحدون يريدون التمسك بهذا الزيف للطعن فى عقائد المسلمين
لتحقيق نفس المكاسب ولكن على الصعيد الدولى

وهذا ما يزيد المتشددين من الدينين تشددا وحتي المعتدلين
يدفعهم للدفاع والانفعال ضد من يسب دينة وعقيدته
فكلاهما يشجع على التطرف الديني والارهاب الفكري

والخاسر اولا واخيرا الشعب المصري بأكملة مسلمين واقباط
فاتمني من اخوانى المصريين جميعا التيقظ لهذة الفتنه
التى ان اشتعلت ستقضي على الحرث والنسل
وستدمر حضارتنا وتاريخنا وانسانيتنا ومصرنا
فلن تبقي ولن تزر وستهدم صوامع وصلوات
ومساجد وكنائس يذكر فيها اسم الله كثيرا

فاللمصريين المسلمين اقول تصدوا لمحاولة استغلال الاخرين لدينكم
والمتاجرة بة فى سوق السياسة والمال

وللمصريين المسيحيين اقول اوقفوا محاولة استغلال الموقف
بالسب والقذف وازدراء عقائد الاخرين والاديان
فهذا افضل فى المسيحية والاسلام

ويجب علينا جميعا كمصريين ان لا نسمح بمحاولات خارجية
من الدول العربية الاسلامية او الغربية المسيحية لتطعيم وتغزية
وزرع فتن بين نسيج وطني واحد كان ولا يزال
..
وطن المؤمنين بالله والمتحابين فيه
لا تسمحوا بان تكون ارضكم وابنائكم
ثمن للمؤامرة

وفى النهاية اقول
الفتنة نائمة لعن الله من ايقظها

26 Comments:

At 08 February, 2007 14:32, Blogger micheal said...

الزعيمة
مش عارف أقولك اية و اللة بس دة مش اول مرة أحس أن فية تواصل فكري عالي بيننا لانك لو دخلتي عندي و شوفتي أخر بوست حتلاقي موضوع مشابة جدا لموضوعك اللي انا متفق معاة تماما في كل حرف لاني شايف ان الاخوان هدفهم الحكم و بعض اقباط المهجر اصحاب التنظيمات المريبة المجهولة المصدر و التمويل يطمحون لزعزعة الايتقرار و تحقيق بعض المكاسب الداخلية باللعب علي وتر الاضطهاد الديني و علي العموم ربنا يكفينا شر الفرقتين و كفاية أوي اللي حصل في مصر من مشاكل طائفية السنتين اللي فاتوا و الموضوع مش طالب نبقي عراق تاني او لبنان تانية لان جيران الهنا مستنيين اللحظة دة من زمان..فالفتنة نائمة لعن الله من ايقظها
تحياتي علي البوست الجامد

 
At 08 February, 2007 15:46, Blogger الزعيـمة said...

micheal اخى وزميلي الفاضل

سعيده ان اول تعليق كان لك
لانى عارفة انك ضربت على هذا الوتر
من قبل فى البوست تطاير الشرار من لغه الحوار

وشفت الوقتي بوست جديد لك
عن حكاية الجسوسية والفتنة الطائفية
وحرد علية فى مدونتك لتوضيح بعض الامور


اتمنى يكون كل المصريين مسلمين ومسيحيين
متيقظين لتلك الفتنة التى تريد احداث شقاق وشرخ فى جسد الشخصية المصرية
عبر صوت المصريين المخلصين لوطنهم
ولتعاليم اديانهم السمحه
وحجب الغلاة من كل الاطراف والمزايدين

وهناك اقباط فى المهجر احترمهم
مثل الاستاذ فرانسوا باسيلي

ومن المسلمين المغتربين البيسعوا
لدرأ الفتن امثال الاستاذ نهرو طنطاوى


نريد لتلك النماذج الطيبة هى التى تعلو وتتكاثر لنحمي نسيج هذا الوطن
اسعدني تواجدك وتعليقك القوي


ولى عوده ان شاء الله

 
At 08 February, 2007 22:08, Blogger مصر هى أمى said...

الزعيمة
بوست عالى الاحساس اوى طبعا جميل جدا انك تكونى خايفة على مصر بالشكل ده لانها وطننا الغالى وجميل جدا انك جبتى الطرفين فى بوست واحد
صحيح هيا مصر عايشة دلوقتى فى فتنة نائمة وانا عندى احساس انها ستستيقظ قريب وربنا يخيب احساسى بس اسمحيلى انى اعارضك فى جزيئة الاخوان المسلمين
اول حاجة الاخوان المسليمن نشأت على ايد الامام حسن البنا ونشات لمواجهة محاولة الاحتلال الانجليزى لمحو الدين عند المصريين وتطورت لتكون اقوى الجهات لمحاربة الانجليز سواء فى مصر او منطقة القناة وبعد كده انخرطت فى الحياة المصرية وانضم ليها الاف المصريين لثقتهم فيها مش علشان هما كانوا بيستغلوا ايمان المصريين الفطرى لا هما انضموا ليها من زمان ودلوقتى لاحساسهم انها الجهة الوحيدة اللى بتهتم بيهم بصى على احسن مثال فى انتخابات مجلس الشعب الاخيرة ليه الناس كانت بتحاول تدى اصواتها لمرشحين الاخوان المسلمين اول حاجة لان الثقة انعدمت بين الحكومة والشعب لان حكومتنا حرامية وفاشلة ومليانة فساد الناس راغبة فى ان الحكومة تتغير ملقوش جماعة تانية منظمة وعندها برامج وكوادر من جميع الجهات وفى جميع المجالات غير الاخوان المسلمين
بصى على جميع اعضاء جماعة الاخوان هتلقيهم اساتذة جامعة ومثقفين ورجال مال وسياسة يعنى منظومة متكاملة يقدروا ان ينهضوا بدولة سيبك من الكلام اللى الاعلام الحكومى بيقوله عن انهم ارهابيين محصلش نهائى انه ثبت على جماعة الاخوان المسلمين انهم ارتكبوا اى عملية ارهابية هما مش مسئوليين عن اى حد تانى يتكلم باسم الدين ويعمل عمليات ارهابية
صحيح هما ليهم بعض الاخطاء بس ده عادى ما هما مش ملايكة طب ما الحكومة بتاعتنا كل يوم بترتكب اخطاء تودى فى داهية لكن المشكلة ان الاعلام عندنا صور ان جماعة الاخوان غرضهم تدمير الدولة وانهم يعملوا فتنة فى مصر
الحكومة عملت كل ده كله علشان خايفيين على كراسيهم وانهم يفضلوا كاتميين على نفس الشعب المصرى ويسرقوا فى قوته اكتر
المرشد العام للاخوان قال قبل كده على المسيحيين
لهم ما لنا وعليهم ما علينا
يعنى هما زينا كلنا نسيج واحد فى وطن واحد نتمنى مصلحته
زعيمة
انا مش من الاخوان ولا حاجة وليا انتقادات كتير عليهم لكن ده مايمنعش انى معجب باسلوبهم فى التنظيم وانهم مش مجموهةمن الجهلة او غير المتعلمين لا دول مجموهة من الناس المثقفة واساتذة الجامعة

تانى حاجة انا عايز اقولها لاى حد مسيحى او مسلم بيقرا المدونة
الشعب المصرى من قديم الازل وهوا نسيج واحد دم المسلم زى دم المسيحى الاتنين رووا تراب مصر بدمهم محمد مات وايده فى ايد بطرس وبنيامين مات وهوا بيدافع عن اخته فاطمة واسلام اخو فاطمة هوا اللى بيراعى مصالح عائلة بنيامين وبيروح لمدرسة العائلة المقدسة علشان يطمن على شنودة ابن بنيامين وبيتلموا كلهم فى العيد الصغير والكبير وميلاد السيد المسيح وعيد القيامة وام شنودة هيا اللى جابت عبد الله زميلها فى الشغل علشان يتجوز فاطمة وهيا اللى وزعت الشربات
صدقونى هوا ده الشعب المصرى الاصيل المسلم بيدافع عن عرض اخته المسيحية علشان هوا متاكد ان المسيحى قاعد يحرس مراته وعياله
عارفيين ليه لان المسلم والمسيحى هما دول المصريين انا مبحبش كلمة مسلم ومسيحى انا بحب كلمة مصرى مصرى مصرى مصرى هيا ديه اللى هتدوم

وانا متفق معاكى ان لعن الله من ايقظ الفتنة

ومعلش طولت عليكى

 
At 09 February, 2007 06:03, Blogger إبراهيم محسن said...

سلام عليكم
موضوع جميل يستحق الثناء..مشكلة تؤرق منامي حقاً
الفتنة دي جزء من الخطة الأمريكية الفوضى الخلاقة أو بالبلدي فرق تسد هي خطة لبذر بذور الفتنة في الشرق الأوسط كي يسيطروا عليه لأن الفتنة بتولد ضعف

ونجحوا فعلاً كنا دوله إسلامية وبقينا دول عربية وبعدين أفريقيا وشبه الجزيرة العربية وبعدين شيعة وسنة وأكراد وخلايجة ومناوفة وصعايدة كده يعني
والتطرف في كل زمان مرفوض التطرف سواء في الدين أو في الفن أو الرأي..الموضوعية مهمة جداً
لكن متقلقيش سيدنا محمد قال إننا كمصريين في رباط وفعلاً إحنا متماسكين جداً رغم الضغط الشنيع من أعلى وأسفل هي ديتها مشكلة أو دولة تحتلنا ونرجع نتوحد تاني
أصل المصري مبيتحركش إلا بعد فوات الأوان

 
At 09 February, 2007 09:07, Blogger ma 3lina said...

سؤال يا زعيمة .. أنا كشخص عايز أوصل للحكم .. إيه أسهل لي .. ادخل حزب وطني واركب الموجة .. ولا ادخل في جماعة مطاردة من 80 سنة ومحظورة من 50 سنة وأعضائها بيعتقلوا عمال على بطال وبيتعمل لهم محاكمات عسكرية ؟؟
مش عارف ليه الناصريين ما شيين ورا عبد الناصر في كل حاجة وكأنه نبي ..
وبعدين الدخول في بواطن الناس ونياتهم دا مجال كبير لو فتحناه يبقى كل واحد بيتكلم يبقى عايز يوصل للحكم .. ومفيش حد عايز مصلحة ..
أنا مش حزود عن كده .. عشان ما يحصلش خناقات .. خصوصاً إني عندي عريس ليكي .. ناصري برضه .. ونفسي أعرفكم ببعض .. بس أنا مش عارف إنتي متجوزة ولا لأ ؟؟ عموما لو مش متجوزة عريسك عندي

 
At 09 February, 2007 14:33, Blogger مصر هى أمى said...

زعيمة
معلش التعليق اتبعت كذا مرة بسبب مشكلة عندى فى الجهاز ياريت تلغى التعليقات الزيادة
واسف للمرة التانية

 
At 09 February, 2007 17:32, Blogger Tamer Nabil Moussa said...

احنا كلنا مصرين مفيش حاجة اسمها مسلم او مسيحى الدين الله والوطن للجميع
.
وياريت نصحى ونفوق ونفهم صج والعراق وما يجدث فيها ليس ببعيد عننا ولا شك ان الموساد وراء ذلك


اشكرك جدا داليا على البوست الاكثر من رائع

ربنا يكرمك

تحياتى

 
At 10 February, 2007 17:33, Blogger الملاح التائه said...

أولا بحييكى على الموضوع الجاد المهم ده
ثانيا : طبعا معروف للكل إن اللى سمح للإخوان انهم يصبحوا قوة على الساحه هما الحزب الوطنى بسياسته الغبيه التى تتعامل مع الفصائل السياسيه بطريقه تضمن لها الإستمرار ولو على حساب الملايين من الشعب المطحون
فتظهر الإخوان وكانهم البديل الوحيد للنظام على الساحه السياسيه لعلمها أن الغرب يرتجف من أفكار الإخوان المسلمين فهى ضد مصالحه على طول الخط
وفى نفس الوقت تضيق على أى تيار آخر غير دينى المرجعيه حتى لا يتألق كبديل متحضر وقوى للإخوان
ومما يدعم ذلك هشاشة القوى السياسيه الأخرى غير الإخوان ومرائاتها ودعارتها السياسيه مع الحكومه ونفاقها المستمر للسلطه والنظام بما فى ذلك الوفد الليبرالى والناصرى القومى العربى وكثير من الأحزاب التى شاخت وسقتط بلتقادم
الرهان هنا على الشباب
إذا تفكروا بمنطقيه وعقليه عمليه أوسع رحابه
سيكتشفون بسلاسه زيف ادعائات هذا التيار او غيره وسيتجهون الإتجاه الصحيح
ثم الأهم أن يظهر البديل

 
At 11 February, 2007 00:43, Blogger el2ahwagi said...

dool motatarefeen w dool motatarefeen ... w kollhom leehom masale7... wala yase7 leay menhom enno ye2ool enno masri ...!!

elmohem en elaqbaat ye3rafo meen homma elmoslemeen el7aq weyfara2o beenhom webeen elli beyastaghelo eldeen lemasale7 shakhseya aw lemogarad ghabawa w 3adam fehm ... we2en elmoslemeen yefara2o been ala2baat el7aq webeen elgahala welmondafe3een wara a7qaad 2adeema mota3afena....

elmasreyeen elwa3yeen bas bewa3yohom homma elli momken yedaya3o 3ala elfari2een forset tadmeer elmogtama3 da ..!!


ba7ayeeki awi 3ala post da... beye3kes roo7 motasam7a wewa3ya mosh ghareeba 3aleeki ..!!

ta7eyati..!!

 
At 11 February, 2007 01:30, Blogger kaed said...

واللة يا زعيمة لو واحد جة من برة و شاف أتنين مصريين واحد مسلم و واحد مسيحى و قلتيلو إية الفرق بين الإتنين حيقولك مافيش فرق ... منهم للة اللى عايزين يولعوها

 
At 11 February, 2007 10:45, Blogger الزعيـمة said...

مصر هى أمى

اشكرك كثيرا على تعليقك وتوضيح الامور
لم اتكلم من قبل عن الاخوان واهدافهم
ولكن ان تعلم جيدا ان ابحت لهم تصريحات مثيرة للجدل مرة طز فى مصر ومش يهمه يحكمها حد تركي ولا باكستاني المهم مسلم ومرة يقولك حندفع المسيحيين جزية!!
كل دي حاجات تولع الدنيا مش بس تعمل فتنه .. اعرف انهم تنظيم مرتب ومتعلم ومثقف عشان كدا بقول كل تصريحاتهم مأخوذة عليهم ويجب ان يضبطوا بعض تصريحاتهم ولا يحاولوا حشد الراي العام الاسلامي فى مصر كأغلبية لتحقيق مقاعد فى مجلس الشعب على حساب اعتبارات اخري

فى كتاب خالد محي الدين(الان اتكلم
قال التحقت بجماعه الاخوان كتنظيم يهدف لتحرير مصر وسالتهم انا وجمال عبد الناصر عن خطتهم الاقتصادية والسياسية ولااجتماعية عند الوصول للحكم فقال مرشدهم العام انة لا يوجد خطط محدده لاننا لو وضعنا خطط سوف نخسر بعض الاخوانيين او بعض الاشخاص!
فهم لا يمتلكون نموذج محدد ورؤية مستقبلية كل ما يودونه هو الوصول لمقاعد البرلمان والنقابات وغيرها
وليس معني ذلك ان الحزب الوطنى حمل وديع بل هو اشد خبث ومكر وخداع
فضلا عن الفساد الذي لا اول لة من آخر

سعدت جدااا بتعليقك وبالعكس مش طولت ولا حاجة كنت اود المزيد من هذا الحوار القائم على التفاهم والاحترام المتبادل
لك ارق تحياتي







إبراهيم
اهلا بك
نتمني ان يتحرك المصري الان ويدافع عن امنة ومستقبلة واستقرارة
يجب التفطن لاى محاولات لزعزعه امن الوطن لان الشعب فقط هو الخاسر
والى متي سنظل اداه تحركها اهواء احزاب او جماعات او دول مجاورة وبعيده !!







ma_3alina
لكى تصل الى الحكم لا بد ان تنافق فقط وتتملق السياسة المروج لها فى هذا الوقت
يعني الشغال اشتراكية خليك اشتراكي صميم
الشغال الرأسمالية خليك اكبر راسمالي فى التاريخ وكدا يعني
ولكن لا اعتقد ان اى فرد يود المحافظة على قيمة ومبادئة سوف يسعي للحكم
من يريد خدمة مصر سيخدمها وهو فى موقعه كمواطن فقط على قدر استطاعته

وبصراحه مش عارفة اية الدخل الزعيم جمال عبد الناصر فى الموضوع؟
انا بتكلم على رؤيتي للاخوان من حيث تصريحاتهم فى السنوات الاخيرة
مش عشان العملوة ولا مش عملوة من نص قرن !!

وان شاء الله مفيش خناقات دا حوار ديمقراطي وطالما كل واحد بيحترم راي الاخر يباه مفيش مشكلة



tamer
ربنا يخليك يا تامر
انت ديما رافع معنوياتي
وزي ما قولت وقال صلاح الدين
الدين لله والوطن للجميع




سعدت بتواجدكم جميعا
اطيب امنياتي لكم

 
At 11 February, 2007 11:20, Blogger الزعيـمة said...

الملاح التائه

أعجبني جدا تحليلك للامور
وانا مش شايفة فعلا فى اى الاحزاب القائمة قدرة على انقاذ الاقتصاد المتدهور ولا الفساد الاجتماعي المستشري ولا حل مشكلات الدولة واى حزب منهم ان تولى الحكم لن يفعل بافضل مما يفعلة الحزب الوطني .. وقيس على ذلك كل الاحزاب
الحكومة لم تكن لتسمح لاى حزب ان يكون لة ايدلوجية لتحقيق اى شئ سوي عقد مؤتمرات والقيام بتصريحات وطي الدفاتر وانتهي .. هذا هو الحال واعتقد ان الملاذ الوحيد هو القوي الشعبية رغم انها تحتاج لتنظيم وترتيب لمطالبها وتحتاج لمن يتحدث باسمها ولكن من ومتي واين؟ لا استطيع الاجابة





el2ahwagi
اللعب على وتر الاديان والمذاهب هو كارت رابح دائما لانة بيمس عقائد الاخرين ومن تلقاء نفسة بيقسم المجتمع الى فرق حسب اعتقادها الديني والمذهبي
ولذلك فاللعب بتلك الاوتار شديدة الحساسية يؤدي الى كارثة دموية لا اقل من ذلك وامامنا العراق ولبنان وفلسطين خير دليل على ذلك

كل مسلم صادق فى ايمانة مسئول عن التصدي لاى فرد يريد التكسب من خلال دينة
وايضا كل مسيحي صادق فى ايمانة مسئول عن التصدي لدعاة الفتن من اقباط الخارج
نريد مجتمع انساني يجد الحق فية نفسه
والدين يلقاة الانسان مع ربة فى حرية عقيده واعتقاد






kaed
المصري المسيحي والمسلم واحد
تلقوا نفس الثقافة
وعاصروا نفس المشاكل والقضايا السياسية والاجتماعية والاقتصاديه
خاضوا نفس التحديات والحروب
وحققوا ذاك النصر والانتصار

الحقيقة لا اجد ثمة اختلاف
فى اى شئ فيما بينهم سوي
فى يوم الجمعه يذهب احدهم للمسجد
ويوم الاحد يذهب الاخر للكنيسة



ارق تحياتي لتواجدكم الرائع
وارائكم السديدة

 
At 11 February, 2007 15:05, Blogger مصر هى أمى said...

الزعيمة
اولا نا مبسوط جدا ان الحوار محترم جدا فى مدونتك بخلاف مدونات تانية

بخصوص الاخوان هما فعلا ليهم تصريحات غريبة شوية بس ده طبيعى لانهم مش سياسيين بالدرجة الكاملة بمعنى ان احنا لو بصينا على رئيس الحكومة فى بدايه رئاسته قال كام تصريح يودوا فى داهية زى مصر دولة علمانية وزى ان المصريين ناقصيين الاهلية بص الحكومة حاولت على قد ماتقدر انها تدارى التصريحات ديه لكن فى نفس الوقت تصريحات الاخوان لازم ينشروها ويحرفوها لخدمة مصالحهم وزى ما قولتلك قبل كده ان الناس من كتر كرهها فى حكومة رجال الاعمال عندنا اتجهوا لجماعة الاخوان
انا كمان قريت كتب كتير عن الزعماء المصريين وعلاقتهم بالاخوان هما فعلا مكنش ليهم خطط اقتصادية ولا سياسيةلانه فى الفترة ديه كان الاهم الاكبر هو تخليص البلد من الاحتلال حتى ظباط الثورة مكنش ليهم خطط لادارة البلاد فى الاول واستعانوا بشرفاء مصر لادارة البلد فى الاول
لكن اعتقد انهم دلوقتى ماشيين فى تخطيط منظم وده اللى خلا الحكومة عايزة تدمرهم لانها حاسة انهم خطر على كيانها مش فارقة مع الحكومة مصر فى حاجة المهم الكرسى والحكم

انا عايز اقول انى واحد من الناس اعز اصحابى ايام المدرسة كانوا مسيحيين ومكنتش بحس باى فرق بينى وبينهم بالعكس كنت بدخل بيوتهم وبيدخلوا بيتنا عادى كلنا كنا بنتعامل ان احنا مصريين مش حاجة تانية

 
At 11 February, 2007 18:12, Blogger elmanfada said...

انا مش عارف ايه النغمة الجديدة اللي ظهرت مؤخرا علي لسان بعض المصريين ، يقولك يا عم دا مسيحي ابن كلب و التاني يرد يا مسلم يا ابن ال....
يا جدعان انتوا مالكوا و مال الدين؟؟ دي علاقة بين الانسان و ربه يعني محدش ليه دخل بيها اطلاقا
يا جدعان ايه اللي حصل لمصر؟؟؟؟ بقي هي دي مصر اللي عاش فيها اليهود -ايوة اليهود- مع المسلمين و المسيحيين؟ زمان كان اللي يحب يهرب من اي اي اضطهاد ديني في العالم كان ييجس علس مصر دلوقتي ايه اللي حصل؟
بس الحمد لله ان الرد جه من مصدر لاشك فيه و ان احنا في رباط الي يوم القيامة و ده اللي مطمن قلبي كتيييييييييييير اوي
و اللي مش مصدق ان فيه ناس بتحب بعضها يروح المناطق اللي بيقولوا شعبية و شوفوا الناس هناك
الناس دي لسه بتتصرف زي ما كانت من 50 سنة
نفسي مصر ترجع زي ما كانت لان مفيش حد مستفيد من كدة ابدا غير طرف واحد
و محدس يسألني مين هو لان اللي ما يشفش من الغربال يبقي اعمي ، و لا ايه؟
انا بحييكي الف مرة علي الموضوع ده و بالتوفيق
اخوكي الصغير هيثم

 
At 11 February, 2007 20:08, Blogger كلام لوجيك said...

اختى الكريمة
الزعيمة
انا اتفق تماما فى كل ما قاله الاخوة
مصر هى امى
و
ما علينا
ومفيش حاجه ممكن اقولها اكتر من التعليق والرد الوافى اللى كتبوه
فزاعة الاخوان خلاص لم تعد تأتى بنتيجة
وكمان احنا مادخلناش جواهم وشوفنا نفوسهم وضمائرهم فيها ايه
غير انهم جماعة منظمه جدا وملتحمة بالشعب ولها انشطتها الاجتماعية
وكل منتسبيها من رموز وصفوة المجتمع المحترم
للاسف الشديد جيلنا كله طلع مشتت ومنزوع الهوية ومفتت الرأي
بمعنى
اننا كلنا لم نعاصر فترة حكم عبدالناصر او فترة حكم السادات
ولكن بنسمع من يسب فى هذا ويلعن فى هذا
واخرين يمجدون هذا ويخونون الاخر
واراء متناقضه ومتباينه ومتضاده
والواحد مش قادر يحكم او يكون رأي حقيقي او محايد بسبب هذا التباين الكبير وعدم وجود اتجاه عام موحد فى هذا المجال
عشان كده انا مش عارف احب عبدالناصر ولا اكرهه
والسادات ايضا كلنا منقسمون حوله وحول حكمه وادارته ومعاهداته وغيرها
نحن فعلا ممزقزن بين هذا وذلك

ارجو ان اكون قد اوضحت وجهة نظري

ملحوظه: الحاكم الوحيد اللى انا فعلا عارف موقفى منه ومحدد رأيي فيه
كلكم عارفينه
اعتقد ذلك

 
At 13 February, 2007 09:48, Blogger الزعيـمة said...

مصر هى أمى

اسعدني استمرار حوارك الهادف
ولا اختلف معك فى رايك بكثير من الامور
ولكن المصريين جميعا لم يعودوا يثقوا فى اى حزب او اتجاه او حتي رجل سياسي
المصريين يعرفون دائما ان كل ذلك محاولات للوصول لكرسي الحكم وبعد ذلك كلة حيكون مبارك بشكل او باخر ومحدش حيسيب الحكم وحيفضل الفساد هو نفسة وكل مشاكل مصر زي ما هي
البلد مش محتاجة سلطة جديدة بمفهومها
البلد محتاجة ثورة شعبية تهد كل ما بني على باطل وتبني من جديد وطن حر ومواطن عزيز






elmanfada
شكرا لمرورك وابداء الرأي
متفقة معاك ان الدين علاقة بين الانسان وربة ومحدش مهما كان واصي على قلوب الناس ولا على ايمانهم
احنا لية مش قادرين نفهم ان الدين معتقد داخلى وايمان فكر وعمل بالجوارح
يعني لا يمكن اجبار حد على الايمان بعقيده غير الهو نفسة مؤمن بيها
فدا موضوع منتهي لا خلاف فية

اما التفرقة على اساس العرق والدين
فدا المرفوض شكلا وموضوعا دينيا واخلاقيا






ساكاماكا نيوز
مش عندي اى اعتراض على كلامك
والاخوان من حيث انهم تنظيم معارض
انا مش مختلفة علية من حيث الفكرة والمبدأ لكن اليجي يقسم المصريين على حسب النوع ولا الدين فانا هنا اقولة عندك والزم لسانك فما تقولة من تصريحات تبذر الجحيم وتحرض على عنف وكراهية وتفكك نحن فى غني عنها

هذا هو موقفي من الاخوان او اى حزب او جماعه او حتي اقباط المهجر انفسهم
اليقسم المصريين لنوع وطائفة ومذهب ودين يبقي واضح جدا ان فية غرض سئ يحاط بمصر من خلال تصريحاتة



اشكركم جميعا على تواجدكم واراءكم القيمة واتمني للجميع التوفيق

 
At 13 February, 2007 12:05, Blogger Malk Almasria said...

صباح لخير
اولا شكرا لمرورك الكريم

والله مش عارفة اقولك اية غير ان اللى بيحصل دة ميرضيش ربنا من امتى كان الواحد بيقرقوا بينه وبين اى حد بمسلم او مسيحى انا اللى اعرفوا ان الناس بيعاملوا بعض على حسب الانسان نفسه ان كان صالح ولا لا ودة مفيش فرق فيه بين مسيحى ومسلم وزى مبنلاقى مسلم تقى بنلاقى مسيحى تقى وبيخاف ربنا زى المسلم وكل دة فى الاخر ربنا هو الى بيقدره دون النظر الى مسلم ومسيحى
وبتمنى ان ايام زمان ترجع ونلاقى المسلم بيدافع عن وطنه بجانبه اخيه المسيحى كما حدث فى حرب اكتوبر بجد كانت ايام مجيدة ضحى المسلم والمسيحى بارواحهم من اجل الوطن فأستشهد بطرس ومحمد على نفس الارض وفداء لها

تحياتى

ملك المصرية

 
At 13 February, 2007 14:00, Anonymous Anonymous said...

تحليل ممتاز

 
At 13 February, 2007 16:24, Blogger Unknown said...

ألبوست ده فى رؤيه واعيه اوى للاحداث و كمان فيه فكر راقى جداً
فكر ارجو انه يصل لكل اخ و اخت مسلمه و كمان انا كمسيحى معاك تماماً فى عدم ربط ما يفعله الاخوان بالدين الاسلامى
و شايف ان تدخل اقباط المهجر بيزود المشاكل و الفتن مش بيحلها
و معاكى فى الوقفه الى لازم نقفها كلنا كابنى ادميين اولاً و كمصريين ثانياً بعيداً عن تيارات دينيه

لان اخطر شئ الربط بين السياسه و الدين و اخطر شئ ان حد يعمل نفسه وصى عليك فى علاقتك بخالقك
وانا عن نفسى اوافق انى اتعامل مع يهودى و حتى عابد اوثان مدام بيعمل واجباته ناحية المجتمع و مبيدخلش معتقده فى واجباته
انا من اشد المناصرين لقيام دوله علمانيه

تحياتى
واحد معجب جداً بارائك و رقى افكارك

 
At 13 February, 2007 19:30, Blogger micheal mohsen said...

أنا معجب جدا بالحوار الراقي علي مدونتك يا داليا

 
At 14 February, 2007 03:19, Blogger إبراهيم محسن said...

كل عيد حب سعيد وانتي بخير وبكره معاكي عريس جامد يهد الدنيا

أنا عارف إن ممكن التقاليع غير الوطنية القومية دي تضايقك يعني ممكن تقولي عيد حب إيه وكلام فارغ إيه

بس برضه أرجع وأقول إنتي برضه في الأول والآخر بنت يعني فدان أحلام وبحار رومانسية وملئ الأرض مشاعر

على العموم كل سنة وانتي طيبة
صديق مخلص

 
At 14 February, 2007 09:31, Blogger الزعيـمة said...

Malk Almasria
صباح الخير ملوكتي

اشكرك على اهتمامك بالمشاركة
كل القولتية نفسنا نشوفه من جديد
الناس الكانت دايبة فى بعضها زمان
والدين كان بيخليها تحب بعضها اكتر
كانوا ناس بسيطة مش عندهم مصالح مستترة
ولا اولويات غير حب الخير ايا كان فين
سعدت برايك ملكة مصرنا








tazart
مرورك اسعدني عزيزتي
اتمني لك التوفيق






whyme
اهلا بك واسعدني تواجدك
موضوع اعتقاد الشخص ودينه
شئ يقيمة الله فقط ويثيبة عليه
مش معقولة للدرجة دي حنعين انفسنا
اوصياء على الله كمان؟ اعوذ بالله

اى دين او معتقد لة شقين
شق عبادات وشق معاملات
عباداتك لله مليش انا اى دعوه بيها
ولا بكيفيتها ولا من حقي تقيمها

اما المعاملات فدي التهمني بس
تعاملنى كويس وتحافظ على وطنا
يبقي انت زيك زيي محدش احسن من حد

بالنسبة للدولة العلمانية فانا شايفة
ان البعد المادى القوي لها
بيفقد الجانب الانساني تواجده

انا موافقة عليها من حيث المبدأ
لان الخلط بين الدين والسياسة
يفسد كليهما وزي ما قال
الدكتور ميلاد حنا ان مواطني مصر
مسلمين ومسيحيين متدينين بطبيعتهم
وبما اننا متوافقين في الرؤية
فعلي كل منا ان يعمل فى جبهته
سعدت جدا بمشاركتك واهتمامك





مايكل

الله يخليك والحوار الراقي نابع
اولا واخيرا من المشاركين الكرام

وبصراحه مدونتك اصدق مثال
على هذا الرقي والاحترام فى تلقي الرأى
والرأى الاخر.. تمنياتي لك بكل التوفيق




إبراهيم
وانت طيب وشكر لك

بس مين قالك ان الحاجات دي بتضايقني؟
التوسط فى كل شئ مطلوب
والتشدد هو البيضايقني جدا

وبلدنا محتاجة العلم والفن والادب والاعياد والمناسبات وكل شئ
طالما بتتم بشكل لائق
وبنستمتع فيها بشكل طيب

ومش لاني بنت محتاجة مشاعر ولا احلام
لانى انسانة وكل انسان محتاج كدا

تابعني فى البوست النهاردة
الكنت ناوية اعمل فية
احتفالي بعيد الحب مع من احب


سعدت بتواجدكم جميعا
لكم ارق تحياتي واطيب الامنيات

 
At 27 February, 2007 20:15, Blogger Dr. Ahmed Wagih said...

معالي الزعيمة! شكراً على تشريفك لمدونتي، جيت أرد الزيارة، لقيت البوست الرائع ده اللي بيدل على حس وطني عالي ويتطابق مع تفكيري تماماً. المتطرفين من الناحيتين وان كان في ناحية اكتر من ناحية، عايزين يولعوها!! تخيلي ان فيه ناس بتقول ان شعار الدين لله والوطن للجميع اللي أتربينا عليه كفر! على اي حال، اتمنى ان الناس تصحى للي ممكن يحصل وتكون اكثر ذكاء وانسانية، ونتعامل كمصريين لافرق بيننا. مرة تانية بوست هايل! وانا رغم اني مش ناصري، الا ان بحب وبأحترم عبد الناصر رغم اختلافي مع بعض قراراته.

 
At 28 February, 2007 20:00, Blogger الزعيـمة said...

Nah·det Masr
أهلا بحضرتك ونورت المدونة
للاسف التيار الوهابي بدا يكتسح مصر
ويقضي على ما تبقي لنا من حب وتسامح
ودا بسبب الانفاق الخليجي لدفع
هذا التيار بيننا وبفضل المصريين القادمين من الدول الخليجية التشربوا بهذا الفكر العقيم السقيم

وعشان كدا زي ما حضرتك بتقول
فية ناس بتقول على شعار الدين لله والوطن للجميع كفر !! .. دا هم يضحك لان الناس دول كفروا حاجات كتيرة اوى طبقا للفتاوي المضحكة المخجلة فبعد تكفير الشيعه وتكفير اى حد بيقول
غير البيقولوة رجال دين معينين
اصبحت التكفير موضه وهواية لديهم


احنا محتاجين اصلاح ديني وعقلي وضميري
محتاجين فصل السياسة عن الدين
لان الخلط بينهم يفسد كليهما

شكرا على تفضلك بالمرور والتعليق
ومش شرط تكون ناصري الاهم انك وطني وبتحب مصر ودا البيجمعنا كلنا
وغاية هدف الناصريين ومحبي الزعيم

وعبد الناصر كان بشر اخطأ واصاب
ولكن ما يجعلنى اعشقة واكن لة كل حب
وتقدير ان اخطاؤة لم تكن مبيتة لنية سيئة وانما كان وطني صميم
وهو من تصدي للافكار والخزعبلات
وحاربها وهزم رعاة الغنم
كل اقباط مصر يعترفون ان ايامة
كانوا يشعرون بالمواطنة الحقة الصادقة


ارق تحياتي لك واطيب الامنيات

 
At 01 April, 2007 21:51, Blogger مهندس زراعي said...

جزاكِ الله خيرا

ولي طلب عندك ويا ريت تلبيه بان تقتربي من الاخوان وتسأليهم هل من اهدافهم هو الوصول الى الحكم بواسطة وضع الدين كطريق

الاخوان كانوا وما زالوا جماعه دعويه

 
At 10 February, 2008 23:35, Blogger mostafa rayan said...

انا معاكي لازم نخلي بالنا من اللي بيحاول يفرق بينا
لازم نخلي بالنا من ا~لأخوان ومن الأقباط المتحدون من كل من يحاول استخدام الدين اي دين من اجل تحقيق مصالحه الشخصية
الأخوان والأقباط المتحدون وجهان لعملة واحدة عملة الفساد الديني والسياسي

 

Post a Comment

<< Home