امسك حرامي
من كم يوم وانا نازلة من شغلي فى وسط البلد
لقيت واحدة ست فى الاربعينات كدا
جاية فى وشي وبتجري وبتصرخ وتقول الشنطة مفيهاش حاجة
وامسك الولد داااااااا
انا بصيت ورايا بعد ما عديتني الست
ولقيت الشارع كللللله بيجري ورا الحرامي
وحتي العربيات بات تزنق علية لما طبعا مسكوه
وهاتك يا رزع وضرب وتلطيش
والست وصلتلهم وكملت المسيرة
وانا طبعا مخلصنيش امشي كدا
رجعت اتفرج واشوف اية الحيحصل
والشاهده لله الشعب دا شعب زي الفل
عنده حموه كدا ومروءة وشجاعه واخر جدعنة
اى حد معدي لية فى الموضوع ولا ملوش فى الموضوع
يمد ايده ياكلة الولد قلمين ع الماشي ..
ممكن المعدى نفسة اكبر حرامي ومرتشي ولا غيره
لكن مفيش مانع يشارك فى الحفلة النازلة على قفا الولد المسكوه
طبعا لو الناس دي نفسها شافوا مظاهرة
ولا حد بيقول امسك حرامية البلد الكبار
ولا حد منهم حيوقف يتفرج حتى ..
وكل واخد حياخد بعضة ويجري
حتي لو طريقة ناحية المظاهرة حيغير طريقة
لكن لما الحرامي يباه حتة ولد عدمان
وتتلم علية فوق ال500 شخص
وكل واحد يديلة الربنا يقدره علية من الضرب والتلطيش
يباة احلى شعب واحلى جمهور ..
هو طبعا الحرامي يستحق العقاب
بس مش يبأه ملطشة الشارع
وبعدين سلوك الجدعنة دى والناس التحب تخدم
مش بتيجي تمسك ليه فى الحرامية الكبار المش بيسرقوا شنطة بس
دول بيسرقوا الشعب كلة حتى احلامنا سرقوها ؟
انا طبعا رجعت البيت مفتخرة بعظمة المواطنين بتوعنا
وان ربنا قدرهم على ولد عمرة لا يتعدي 15 سنة
طلعوا فية غلبهم وقهرهم وقلة حيلتهم وبختهم
يعني كل واحد عنده مشكلة فى بيتة ولا حياتة ولا شغلة
ربنا رزقة بالولد دا نفس عن نفسة تمام
وسألت نفسي طب لية مسلمهوش للشرطه على طول
بدل ماهما مرمطوا بية ارض الشارع ..
ولية الناس دي متلمتش على الشباب التحرشوا بالبنات فى العيد
بالعكس اشتركوا معاهم فى الحقارة الحصلت
بس افتكرت حرصنا على مبدا المشاركة وان الشارع لنا
والشعب بما انة عارف وفاهم كل حاجة بس بيكتم لحسن يتحسد
فقالك يعني الشرطة تلطش بس واحنا ملناش نفس يعني !!
ولا الشرطة تنتهك المواطنات واحنا لاءة !!
اديني بنطبق سياسة الدوله واهو كله بثوابة
واخيرا تذكرت حكمة عظيمة خلدها الشعب المصري
الـلي لية ضهر فى مصر مينضربش على قفاه
الـلي لية ضهر فى مصر مينضربش على قفاه
posted by الزعيـمة @ 11:21 AM
14 comments
14 Comments:
انتم كده دايماً يا بلد ما تجوش الا على الغلبان
نجوى ابراهيم من فيلم الارض
كويس ان لواد ده لسه عايش
فى ناس بأه يكون طالع عين ابوها فى الشغل او المدام كاتمه على نفسهم فى البيت
يلاقوا حرامى صغير زى ده كده ويفضلوا يضربوا فيه على سبيل التغير
ولك الله يا مصــر
رائعةالـلي لية ضهر فى مصر مينضربش على قفاه
أعتقد أننا لدينا في المغرب حكمة مشابهة للأسف لا تحضرني الأن لقد تعطلت ذاكرتي أعتذر"
تحياتي للزعيمة ..وكل زعماء النت زي حلاتي كده من اللي بيحطوا قدامهم فنجان قهوة مبخر في البرد والطفاية على شمال الكيبورد وهات يا بكى وأنين مع الكيبورد .. ياه الدفا حلو يا زعيمه .. مش معقوله الواحد يضحي بصبتكم الحلوة دي والدفا ده والقهوة الجميله دي والسيجاره اللذيذه دي ويروح ينام على الأسفلت اللي فاتحين فيه الميه طول النهار عشان يربونا
هو ده السبب يا زعيمه .. ضرب الغلبان ده في الشارع أسهل بكتير من الوقوف في مظاهره ممكن تقلب بغم ويلمونا هيلا بيلا على بيت خالتي فرنسا .. يعني كل واحد من الناس اللي ضربوا دول راسم في دماغه يرجع البيت ويتغدى ويشرب الشاي المتين ويقعد يتفرج على الفضائيات ويلعن اليوم اللي شاف فيه وجه الست المدام اللي مش زي بنات الفضائيات .. يقعد يغلي قدام أطفالنا الميتين في فلسطين ولبنان ويتابع بحماس مباراة عباس الصهيوني مع حماس ويتحمس أوي ويلعن أبو الصهاينه ويقوم في آخر الليل يبوس العيل ويغطيهم وينام ويحلم ببكره ما يطلعش زي النهارده ويتمنى من الله أن يسقط براكينه وحمم غضبه على المجرم حسني مبارك .. (دعوة قبل النوم) مين بقى يضحي بكل ده ويدخل مظاهره يا زعيمه؟؟؟
الحكاية يلزمها تغييرات جوهرية يا زعيمه
تغييرات في برنامجنا اليومي ذات نفسه وفي أحلامنا وطريقة تعاطينا مع الحياة بصفة عامة
أكيد حنتغير .. وأكيد حييجي يوم نغير طريق البيت ونروح على مكان المظاهره ونبات هناك شهر واتنين لغاية ما ناخد حقنا .. الحكاية بسيطه .. مجرد الثقه في أنك لن تقفي وحدك في المظاهره .. ده الجدار اللي كسرت فيه كفايه فتحه صغنونه وبكره تكبر ومين عارف يمكن يقع الجدار كله
تحياتي لك والجميع
ur story is an example for the double standards we have here in eygpt
shady
رغم انى مشفتش الفلم
بس هي البلد فعلا متجيش غير
على الغلابة حتي لو الغلابه دول
مننا فى بعضينا
المهاجر المصري
والهي انا سبت الساده متحمسين
معرفش الولد نظامة اية الوقتي
ولا فين اراضية
بس المنظر كان مضحك ومبكي
فى نفس الوقت
مصطفيتش
اضرب فين يا ابني دنا حاسة ان مفيش حتة حتكون ما اتلطشتش
انا وقفت اتفرج شوية وبعدين خدوه بعيد قولت ونا مالى باة اروح لا اتاخر
وزمان الغدا جاهز وانا كنت جعانة بصراحه
tazart
اهلا بالمغرب واهل المغرب
شوفي يا عزيزتي حتي لو فية حكمة فى المغرب تشبه المثل دا
معتقدش حتكونوا بتطبقوها زي عندنا
دا احنا عندنا اخلاص فى الضرب
وخصوصا على القفا
وبيطبق من اقل بواب فى عمارة
لاكبر سلطة تنفيذية فى مصر
IBN BAHYA
اتفق تماما مع ما قولتة
حتي الواحد اليفكر يتكلم يقولك منا حتكلم ولا حتظاهر لوحدي وحيجوا يلمونا على المعتقل ولا حنغير حاجة بس الحيروح فيها الوحيد هو انا
واكيد فنجان القهوة والدفء فى المنزل يغري الجميع مبنكرش بس رحم الله امرء عرف قدر نفسة
فبدل دي قدراتي لية اتشطر على الغلابة حتى لما بيغلطوا ؟
كان يكفي يودوه الشرطة وهي حتتصرف وحتقوم بالواجب ويباه كفايا علية تلطيش الامن
بس نقول اية باه نصيبة
maf2ou3a
that is fact in our nation regrettably
but all of them afraid to do something else , citizens
know that the judgment is deserted
ارق تحياتي للجميع
المجرم بريء إلأى ان تثبت إدانته، الناس في الشارع أصبحت القاضى والجلاد على أي حد غيرهم، من أكبر راس لاصغر راس.. نفسي مرة الناس تعرف تحكم على نفسها زي ما بتعمل مع غيرها، صحيح حرامي واتمسك بالدليل لكن هيهات الناس تسيبه، طبعاً لازم تبان الشهامة علشان كل واحد يرجع بيته سعيد ويحكي لمراته انه ساهم في تربية واحد حرامي... ومش بعيد يزود شوية خيال علمي من عنده علشان يزيد من فحولته ادام مراته ويحسس ولاده انه جامد موت...
وعموما دي كلها مركبات نقص لا تظهر إلا في المجتمعات الفاسدة وهي برضه نوع من إعطاء الذات إحساس بأن كله حلو وتمام وإحنا زي الفل... وسلمولي على مصر...
الزعيمة
طبعا البلد دة بصراحة مبتشطرش غير علي الحرامي الغلبان بس علي فكرة هما بيضربوة كنوع من تفريغ الكبت زي بالضبط اما تلاقي عربجي نازل في الحمار ضرب أو تلاقي ماحد بيشوط في قطة في الشارع..لا حول اللة يا رب...ربنا ياخد اللي كان السبب
كانوا فين ال500 غضنفر همام دول لما كان فية 1000 شاب بيتحرشوا ب 70 بنت في العيد في وسط البلد؟؟؟؟
L'orientale
احنا معندناش متهم ولا برئ
احنا اى حاجة نخش فيها ونديها
لينا فيها ولا ملناش منستناش
مانتى عارفة ان المصريين جدعين اوي
micheal mohsen
تفريغ الكبت دا خلى كل واحد يتشطر على الاضعف منه لما بقينا فى غابة
لو كل واحد يخلية فى نفسة ولو ربنا اكرمه يتصرف يعمل الصح بهدوء وبدون مزايده حنكون افضل من كدا بكتير
الحصان الأسود
الـ 500 غضنفر دول
كانوا مع الـ 500 التانيين بيتحرشوا
وهو دا مجموع الـ1000 الكانوا فى وسط البلد فى العيد
ربنا يستر فى العيد الجاى
ارق تحياتي لمروركم جميعا
ايها الناس اسمعوا وعوا انه من عاش مات ومن مات فات وكل مكل ماهو اتآ ات ليلا داج ونهار ساج ونجوم ذات ابراج
اين الفراعنه الشداد
empire
شكرا على هذا التعليق العميق العتيق
في بقا موقف حصل قدامي يوم الاتنين اللي فات في الحسين
ولد صغير ميجيش في تالتة اعدادي
مهواش حرامي ولا حاجة
انا واصحابي قاعدين على قهوة في الحسين
وهوا جاي يعرض علينا شراء مصنوعات جلدية جميلة جدا
وفجاة وهاو بيكلمنا لقيت عسكري حقير جه اداله على قفاه
انا هكتب الموضوع كلو في بوست جديد عندي ان شاء الله
وهي دي مصر يا عبلة
واحد من الناس
ما سردتة يحدث كثيرا وتعرف باقي القصة اية واين تنتهي ؟
عندما يعطي هذا الولد الصغير بعض النقود لهذا العسكري لانها اصبحت بلطجة
وهذا ما رايتة بنفسي من فترة عندما مر احد عساكر الامن على البائعه المفترشين فى الشارع واخذ من كل واحد منهم مبلغ ومشي
تحياتي لمرور
Post a Comment
<< Home