مش كذبة إبريل

نشر جرنال الاهرام فى صفحتة البعد الوفيات ..شوف الفال
هذا الخبر السعيد المحفز لشباب مصر على الاقتداء

باحد اخوانهم من الشباب العصامي

يفيد بان صاحب الجلالة ملك مصر حيزف ابنة البكري جمال
للآنسة خديجة في الاسبوع الاخير من شهر ابريل


وطبعا مش عايزين قر ولا حقد على الراجل ولا ابنة
الولد ممتاز وعريس مايتعايبش وعمل العلية وزياده

مخلاش على جهده جهد وقام بالواجب من خروج وفسح ومواسم

واشتغل بجد وتفاني لما وصل لامين عام السياسات بمجهوده
وقدر يحوش من مصروفة ويشترى شقة فى المساكن
العملاها جمعية شباب المستقبل لشباب مصر بتاعة 09000
يعني اتصل ارضي ومحمول لما جالة الحظ وفاز..

حد عنده اعتراض؟

ومش عشان خدله شقة مطرحين وصالة وحمام فى صقر قريش
ولا مدينة 6 اكتوبر وفرشهم من عبد الرحيم عمرو بالتقسيط
نقعد نجيب فى سيرة الراجل والحقد يشتغل !! فهمني طبعا

ويذكر ان المكافح جمال مبارك عمل جمعية مع بعض اصدقائة
ساويرس وعز ونظيف وغيرهم وقبضها الاول عشان مصاريف الفرح
يعني شاب منكم وفيكم فبلاش النفسنة الفيكم دي يا شعب

واتفق مع الخطيبة الجميلة انهم حيدخلوا بدون بعض الاجهزة الكهربائية
عشان الاسعار مولعه وطبعا العين بصيرة والايد عايزة قطعها

وفية بعض المقربين من الاسرتين بيتكلموا عن بعض المشاكل
الحصلت بين اسرة العروسين على مين علية النجف والستاير
لكن الحمد لله اتفقوا يمشوها كليم ولمضتين قلاووز
واهو فى المستقبل كل حاجة بتتجاب ويبنوا العش اشة اشة

يعني بصراحه نموذج لكل شباب مصر المكافح
فاحلى تحية لشاب مصر الاول
ربنا يوفقة ونفرح بكتكوت صغير فى القريب العاجل
بس مش عارفة هل يجوز ان يتولى هذا الكتكوت فى سنوات الرضاعه
امين لجنة الشباب والرياضة مثلا فى الحزب الحاكم ام لا يجوز ؟
نسيب الفتوي دي لاهل العلم ويجيب عليها ان شاء الله
الشيخ طنطاوي اطال الله عمره وبإذن الله حتكون يجوز
زواج مبارك ان شااااااااء الله ..

والفرح معمول فى مركز شباب عزبة النخل

وحيوزعوا علب فيها حتة جاتوة سوارية وسندوتش جبنة رومي

وكباية شاي او ازازة كوكاكولا

الدعوة عاملة لكل الشعب .. وعقبال عندكم جميعا