!! هل بوسعنا الاقتصاص من الكلاب
الصورة للامير تركي بن عبد العزيزماذا بعد فضائح اسرة الاميرالسعودي تركي بن عبد العزيز
التى تحتل الطابقين 32 و33 في فندق هيلتون رمسيس في القاهرة
فمنذ اعتداء ابن الامير وحرسه على رجال الامن في الفندق
الى ادانة الاميرة هند الفاسي زوجتة بسرقة مجوهرات
من محل في الزمالك وصدور حكم المحكمة المصرية عليها
بـ 3 سنوات سجن مع الشغل الذي لم تنفذ
الى الفضيحة الفنية التى نشرتها جريدة صوت الامه
من قيام مطربي مصربغناء اغانى خاصة لهند الفاسي
تمدحها وتبجلها جمعتها على اسطوانات
وهو بكل الاحوال عوده لزمن غناء الجواري والعبيد لاسيادهم !!
برغم كل ذلك وحيرتنا واسئلة المصريين المتكررة التى لا تلقي جواب
ما سر قوة هذة الاسرة واحتلالهم لفندق هيلتون وإسائتهم البالغه
والمتكررة لمصر والمصريين فى احداث كثيرة وشهيرة
ولكن اخر الاهانات لم تصدر منهم شخصيا لمصري
بل صدرت من كلابهم لطفلة مصرية تدعي حبيبة
يقول والدها سعيد محمد السيد 36 سنة - طبيب - أنه اصطحب زوجته منار
واطفالها الثلاثة حبيبة 7 سنوات وفرح 5 سنوات وعلي 9 أشهر
للاحتفال بعيد الحب في فندق موفمبيك حيث طلبت ابنتاه حبيبة وفرح
اللعب في المراجيح داخل حديقة الفندق. وفجأة هجمت ثلاثة كلاب
علي ابنته حبيبة التي راحت تستغيث لكن لا ينقذها أحد.
بينما اكتفي حارس الكلاب بالوقوف في إحدي شرفات الفندق يتفرج !!
أضاف الأب أنه أسرع لنجدة طفلته بعد ان أبلغته ابنته الثانية فرح بما حدث
ونقلها إلي مستشفي دار الفؤاد لعلاجها وتبين ان الكلاب الثلاثة
أصابتها بجروح في الوجه وأنحاء متفرقة بالجسد وقدم بلاغاً بما حدث
في قسم 6 أكتوبر و أكد الأب في التحقيقات ان ما حدث يدل علي الاهمال
من جانب حرس الأمير الذين تركوا الكلاب تطارد الطفلة الصغيرة
وهي تصرخ وتستغيث دون ان ينقذها أحد من أمن الفندق
بعد ان خشي الجميع الاقتراب من هذه الكلاب المتوحشة
وبعدها اكتفي الحراس بأخذ الكلاب من الحديقة وزعموا
أن السلسلة الحديدية انقطعت. وهذا الكلام غير صحيح
لأنه لا يمكن ان تنقطع السلاسل لثلاثة كلاب في وقت واحد.
أكد الطبيب ان احتفاله بعيد الحب مع أسرته تحول إلي حزن
بسبب "كلاب الامير" المتوحشة التي تركها الحراس تهجم علي الأطفال
بلا رحمة أو هوادة مشيراً إلي أنه لولا سرعته في نقل ابنته
إلي مستشفي دار الفؤاد لتمكنت الكلاب من قتلها بسهولة
لأنها لا تمتلك القدرة علي الدفاع عن نفسها من هذا الهجوم
!! وطالب باتخاذ الاجراءات القانونية ضد من تسببوا
في إصابة ابنته وسببوا لها الفزع
هل تتوقعون اننا نستطيع - لا ان نقتص من افعال الامير واسرتة
بدأ من ضابط الشرطة الذي تجرا وسأل حراس الامير ماذا تفعلون
ففقعوا له عينة .. ولا الاميرة التى سرقت مجوهرات ب3 مليون دولار
وصدر ضدها حكم ولم ينفذ ولا اهانتهم المتكررة بالتصريحات
- ضد المصريين وانهم يطعموننا من خلال دولتهم الموقرة فى فندق الهيلتون
!!! ولكن هل نستطيع على الاقل ان نقتص من كلاب الامير
.. اترك الإجابة لكم
posted by الزعيـمة @ 10:06 AM
24 comments
24 Comments:
الزعيمة
ليه كده تقلبى المواجع على الواحد
يا زعيمة ديه مشكلة ان مصر مبقاش فيها حكومة ولا دولة ليها سيادة احنا رجعنا تانى لايام الاحتلال بس دلوقتى احتلال كل واحد معاه فلوس يعمل اللى هوا عايزة فى مصر عارفة ليه لان الامن عندنا اصبح امن سياسى بس كل همه حماية الريس وعائلته وحاشيته بس اما الشعب المصرى فدول ولاد ...... ميستهلوش حد يحميهم
بس لمعلوماتك ان الامير دلوقتى نقل اقامته لموفنبيك مدينة الانتاج الاعلامى واخر فضايحة ان كان فى فرح فى الفندق والناس عاملة دوشة وهوا بسلامته مش عارف ينام فقام دخل عليهم بالكرباج اه والله العظيم بالكرباج وقفل الفرح بدرى علشان الامير ينام
طب ده الامير ارحم شوية من ابنه اللى معجبوش ان ادارة الفندق رفدت موظف عندها لسوء سلوكة فراح استعطف ابن الامير علشان يرجعه تانى ولما ادارة الفندق موافقتش ترجعه دخل ابن الامير على الاستقبال وضربهم وجاب لموظف الاستقبال ارتجاج فى المخ ومحدش قدر يكلمهم علشان احنا مبقيناش دولة احنا بقينا زريبة وكل واحد يدخل يلطش فينا شوية وطول ما الحكومة بتسهر عند الامير والاميرة ويقبضوا اخر الشهر تفتكرى ممكن حد يحاسبهم ده احنا دولة معندهاش كرامة نهائى
عارفة ايه الحل انا لو ابو البنت ديه والله العظيم لاروح جايب مسدس واعمل شغلتى الوحيدة انى استنى لحظة واحدة يظهر فيها الامير ده واقتله وياروح ما بعدك روح
ربنا يكون فى عون الاب ده بنته ضاعت ومعرفش ياخدلها حقها
وربنا يصبرنا على الحكومة ديه اللى مابتشطرش غير على الغلابة والمساكين بس
ومعلش طولت بس انتى جبتى سكينة وقعدتى تتغطى على جرح مفتوح
يازعيمه دى حاجه بسيطة من اللى بيحصلنا فى مصر وبرا مصر
احنا ماعدش لينا قيمه داخلها او خارجها
فعلا علي رأي عاشق مصر دي حاجه من الحاجات اللي بتحصل وده العادي فالبلد بلدهم -الحزب الوطني-يعاقبوا من يشائوا ويقتصوا من من يشائوا ايضا الشعب المصري المسكين اصبح هو المعتدي عليه ولكنه لا يقدر علي فعل شيء وانا كان ليه تجربه سابقه وهي اني كنت مع صحابي وواقفين في لجنه ومن الناس اللي ممعهاش رخصه واحد شكله عادي ولكن بعد مافتح البسبور والظابط لاقاه منالعائله المالكه في قطر كل سنه وانت طيب فالقانون علي اللي ممعاهمش واسطه -الشعب العادي ,,وبالنسبه لسؤالك اقدر اقولك حاجه أما نقدر نقتص من انفسنا (المجرمين اللي في البلد الكبار يعني) نبقي نقتص من دول عادي وساعتها حتي الكلب مش هيعمل كده!!! وشكرا لك
لا لن يحدث أي قصاص حتي و لو كان من كلاب لان ببساطة التاريخ يؤكد أن مصر هي أم العروبة و رائدة الامة و هي الام الحنون التي سجب أن تفتح صدرها لكل العرب حتي و لو كانت حتاخد بالجزمة و أنا حكيكلك كام قصة علي الماشي تؤكد كلامي
في نوفمبر 1898 هزمت مصر الجزائر و صعدت لكأس العالم فراح لاعب جزائري مشهور اسمة الاخضر بللومي فقع عين دكتور مصري اهناء عودة بعنة الجزائر للفندق و مر الموضوع بسلام و خسر الدكتور عينة و راح الاخضر بلدة دون أي عقوبة...عاوزى حكاية تاني..حاضر من عينيا..في مبارة كرة طائرة بين مصر و تونس عام 1999 فاز المتخب المصري في القاهرة فقام الجمهور التونسي بتكسير بعض المقاعد بالصالة و قام لاعبو تونس بالاعتداء بالضرب المبرح علبي العاملين في الصالة هم عادوا الي توني في سلام و الطريف في الموضوع ان السيد المخرج أول م الضرب اشتغل نقل زاوية الكاميرا ليقف الصالة عشان محدش يشوف حاجة و بالتالي رفض الاتحاد الافريقي معاقبة تونس لعدم وجود دليل..أكيد برضة سمعتي عن علقة ليبيا في الكرة الخماسية مؤخرا و دة نتجت أن اتنين لعيبة من عندنا جالهم ارتجاج و رجعوا لمطار القاهرة علي كراسي متحركة..دة غير موضوع يامن بن ذكري و وسام العابدي التوانسة المحترفين بالزمالك لما ضربوا ضابط شرطة و طبعا اللواء علاء مقلد في الزمالك سوي النوضوع ودي و بقي كلة سمنة علي عسل..عندك وقت تسمعي تاني و لا كفاية و عذرا للاطالة..أنا بس حبيت أجيب كام مثال مشابة للايضاح بس فية تاني علي العموم
تحياتي لكي يا داليا
طبعا مهزلة من مهازل النظام الكتيرة ..
اتفق مع ابن ناصر ..
قبل ما نعتب عليهم .. نعتب على المصري اللي بيعمل كده في مصري زيه ..
يعني لا أمير عربي ولا بيدخل عملة صعبة ولا سياحة ولا حاجة ..
والمصري الغلبان مش بيعرف ياخد حقه
من مصري زيه .. ما بالكم بأمير دولة تانية .. عمري ما سمعت إن سايح يعمل كده في ابن البلد غير في مصر .. عشان مفيش حد فاضي يحمي كرامة المصري .. حسبنا الله ونعم الوكيل
الموضوع دا من زمان مش دلوقت بس ..
عارفين موضوع كلب الست لأحمد فؤاد نجم
الزعيـمة said...
زميلي مصر هي امى
بعتذر ان كان البوست سبب لك مضايقة
وتاكد ان الجرح القابع فى نفسك بداخلنا جميعا وفتك بكل مشاعرنا
لا اجد ما اقولة او حتى استطيع تفسيرة
انت تعلم ما يحدث للمصريين العاملين بالخارج من اهانات رغم انهم ذهبوا للعمل ولتحقيق الانتاج وللمساهمه فى نهضة تلك البلدان ورغم ذلك يهان
فى حين ان السياح العرب ياتون لمصر يدفعون اقل ما يمكنهم دفعه فى اى دولة اخرى ويحصلون على امتيازات تفوق قيمتهم فى دولهم حتي يصلوا بها لتحقيق ما يتمنوة فى بلدانهم
الغريبة لا اعلم كيف تسمح حكومة بلدنا الموقرة بذلك ؟
اى اموال تاخذها من هذا الامير الذي يعيش بلطجة هو وزوجتة واسرتة
زوجتة هند الفاسي الحرامية
وهل حكومتنا بكل ما تسرقة هي ايضا من اموال الشعب بحاجة للمزيد!!
لا اجد اى مبرر لذلك
اشكرك على تواصلك ويسعدني مشاركتك دائما وبالعكس انت مش بتطول ولا حاجة كلامك كلة بيكون فى صميم الموضوع وغايتة
اسعدني تواصلك واقدره
وبالنسبة لردك الثاني على فى مدونتك
بخصوص موضوع الاخوان المسلمين1
فقد قرأتة وجزيل الشكر لك
عاشق مصر
اهلا بك وتشرفت المدونة بمرورك
طب عايزة اعرف لية مش لينا قيمة برا مصر ولا جواها ؟
براها طالعان عنينا فى السخرة مش العمل البناخد بمالمقارنة بالبنقوم بية ولا حاجة
يعني المصري بيشتغل برا كتير وبذمة وبضمير والبيحصل علية ممكن اعلى من دخلة فى مصر لكن بالقياس بالمجهود يعتبر ايضا ظلم لة وجوا مصر طالع عنينا برضة ومش اعدين ناخد حاجة من جيب حكومتنا كله اهلنا البيدفعوه ضرايب
طب لية باه مش لينا قيمة واحنا مش مكلفين حد؟
شكرا لمرورك وتعليقك
ابن ناصر
طب كويس القولتة ان لما نقدر نقتص من
المجرمين الكبار فى البلد حنقدر نقتص من الاخرين لكن على الاقل فى كل الدول حتي الفيها حكم استبدادي زي عندنا مثل غالبية حكومات الخليج لكن المواطن بالمقارنة مع الاجنبي بيلاقي حكومتة بتنصره يباه احنا لية على الاقل بيتبخس حقنا امام الغريب؟
وللعلم ممكن يكون الغريب دا ولا حاجة فى بلده بس مجرد يحوش من راتبة مبلغ ما يجي يعمل بيهم فى مصر هنا بني آدم
شكرا لك واسعدني تواجدك
مايكل
طب لية البيحصلنا دا؟
ايام جمال عبد الناصر رحمة الله
كان مجرد ما يقول قمة عربية فى الاذاعه
يهرولوا على مطار القاهرة حتي بدون ما يعرفوا جدول العمل ولا سبب القمة
اسمع ان زمان كانوا العرب دول يقفوا بس عشان يتفرجوا على المصري بيمشي ازاى وبياكل ازاى وبيتكلم ازاى
كانوا نفسهم يتكلموا معانا او يعرفونا عشان يحسوا بالفخر الوقتي بيضربونا؟ واحنا نسكت
بصراحه القولتة كان جديد عليا بس بعرف قصص تانية مشابهه زي العملوة الكويتة فى المصريين بمدينة الخياط الكويتية والدكتور المصري فى السعودية الاعتدوا على ابنة وحاجات كتيرة اوى
للدرجة دي بقينا ارخص عملة؟
دبلوماسي سعودي صديق لبابا
قالة بصراحه المصري عندنا اقل من الهندي لان سفارة الهندي ممكن تقلب الدنيا اما انتم سفارتكم ضعيفة جدا ويكفي اننا ندي العاملين بالسفارة شوية كراسي جديدة يسكتوا على اى شئ بيحصل للمصريين
حاجة بجد تقهر وتعذب النفس
شكرا لتعليقك يامايكل
ma_3alina
اهلا بك وبدوام تواصلك
برضة ارجع واقولك هو بيدخل اية يعني وعملة صعبة اية دا لو راح اى بلد تانية مفيهاش غير شوية جناين حيدفع اضعاف البيدفعه فى مصر وبعدين هو السايح العربي لما بيجي بيدفع فين يعني؟
فى المتحف فبيدخل لوزارة الاثار
ولا كلة فى بيوت الدعارة !!
ولعلمك معظمهم بيجيبوا معاهم اكلهم وشربهم لانهم مش بيثقوا فى المية الاحنا بنشربها ولا الاكل البناكله
يعني مش بيجلنا منهم غير قلة الادب بس
فين الدخل القومي البيجي من وراهم؟
طب تتوقع ايام عبد الناصر كانوا يقدروا يعملوا كدا؟
تحياتي لمرورك ومشاركتك معنا
وعجبني شعر كلب الست
حاجة تحزن بشكل
ارق تحياتي للجميع
الى بيحصل عادى جدا ادام عيشين فى بلد زى الى احنا فيها ديها لما بقى الى بيسرقونا وينهبونا هما اسيدنا الى بنخاف منهم ونعملهم الف حساب احنا هانت علينا نفسنا اووووووووووووووووى فا منتظرش اننا نهون على الناس
بجد بقى المصرى ارخص مما يتصور هو كمان
شكرا لمرورك يا زعيمة بالنسبة لوضع المصريين فى الخارج وبالذات فى دول الخليج اقل رواتب هى رواتب المصريين وهنا الراتب بيتحدد حسب الجنسية مش الكفاءةوده لاسباب كتير اولها ان المصرى بيرضى باى راتب مهما كان وبيحسبه مقارنة للجنيه المحاسب بيجى على 800 ريال ويقول يعنى 1200 جنيه ما بيحسبش المعيشه هناك ايه ولما بييجى بيطر يستحمل اى حاجه عشان يغطى تكاليف السفر والاغلبيه للمكتب اللى جاء عن طريقه المصريين هنا وحشين مع بعض جدا السفلرة حدث ولا حرج عمرها ما تقف جنب مصرى الموضوع كبير واحاول ان شاء الله اتكلم عنه فى مدونتى اعزرينى على التطويل
طأطئ رأسك يا أخى فقد مات جمال عبد الناصر
على رأي المثل..اللي يخلي قفاه مداس يستحمل كلام الناس
مش كلامهم بس..كلامهم وقلة أدبهم وكلابهم وحقارتهم
معذرة داليا إن تلك الأمور التي تحدثتي عنها لم تحدث أمامي..مجرد سماع وقراءة..وعفواً أنا عندي كرامة لا يستطيع أحد سلبها مني..عندي قوة..وإرادة..لذا كل تلك الأمور أكتفي أمامها بهز الرأس لأني لم أواجهها..واجهت موقف مشابه ولم أتردد لحظة في الفعل..كل ما في وسعي لأجل أن أسلب من الحقير كرامته..والسفيه حقارته..والخائن شرفه..فهل من مزيد؟
العيب مش فى الامير و لا الميرة العيب فى ملوكنا اللى سابونا للكلاب و لاى كلب
كلب اصله بنى ادم ولا كلب حقيقى
مش المشكلة فى التجاوزات
ما بعد التجاوزات هو المصيبة
للاسف كل شىء فى مصر ممكن و لكن بمقابل هل تفهمنى ؟؟؟؟؟؟؟؟؟؟؟؟؟؟؟؟؟؟
اذا اردت عمل بمقابل
اذا اردت علم بمقابل
اذا اردت شر بمقابل
اذا اردت عيل صغير بمقابل
كله بثمنه
اين ذهب الشاب القطرى الذى قتل بسيارته شباب مصرين ؟؟؟؟؟؟؟؟؟؟
كل شىء ممكن
و الله ممكن
العيب لا عيب حاكم
ولا عيب امراء
ولا عيب سياحة
ولا عيب كلب
العيب عيب محكوم رضي بالخضوع
لا كرامة لنبي الا في وطنه
وطول ما احنا هنا متهانين
ومتاخد حقنا
وبرضه واحنا برا بلدنا متهانين ومتاخد حقنا
حسبي الله ونعم الوكيل
وحده هو الله
القادر
الزعيمة
اشكرد على ردك جدا
على فكرة انا نزلت البوست التانى بتاع الاخوان المسلمين ياريت تشوفيه
وشكرا
تسلم ايديك يازعيمه علي البوست الجامد ده
الخلاصه
المصري مالوش كرامه ولا ديه في بلده ولاخارجها
للأسف مافيش لنا حكومه زي الناس تدينا حقوقنا وما تسمحش لحد يعتدي علينا
محض روح
يمكن زي ما قولتى ان هانت علينا نفسنا
فهونا على الناس لكن مين السبب؟
مين العمل كدا فى المصريين الكانوا لا يقبلوا اى اهانة ولا تي بالنظرة
المصري كان يروح اى مكان بقيمته ومكانتة الوقتي ممكن يقبل يسف التراب عشان لقمة العيش
واحد محتاج يصرف على اولاده
وبيشتغل فى دولة خليجية بتدية راتب بالكاد يصرف بية على اهله
يقولك ما يهزاونى ولا يعملوا اليعملوة
هو عشان كرامتي اخلى اولادي ومراتي يموتوا من الجوع!!!!!
لو كان فى بلدنا حد بيحترمنا مكنش مصري اضطر يسافر بره ويشوف البهدله
تشرفت بمرورك وزيارتك الاولى للمدونة
عاشق مصر
اشكرك على تعليقك وبالعكس مش بتطول ابدا احنا بنستفيد كلنا من افكار واراء بعض واتمني نشوف مواضيع تفصيلية عن العمالة المصرية بالخارج فى مدونة حضرتك ونعرف مزيد من الحقوق الغائبة والكرامة المهدرة خارج حضن الوطن
سعيده باستمرار الحوار
shady
فينك يا رفيق ؟
هو عبد الناصر مش قال لو مات
جمال عبد الناصر فكلكم جمال عبد الناصر
نطأطا راسنا لية ؟ ومعقولة مفيش حد فيكم جمال عبد الناصر! امال بنحبة كدا وخلاص ! عايزين حد يحبة ويقتدي بية تعبنا مهانة باه
نورت المدونة
إبراهيم
كل ما قولتة واكثر يحد للغالبية من المصريين العاملين بالداخل والخارج على حد سواء والبيسكت طبعا معروف عشان لقمة عيشة زي ما بيقولوا لكن انا هنا مش بقيم سبب سكوتة قد ما يقيم سلوك الاخر البيستعبد الناس عشان مشغلهم وبيديهم راتب نظير تعبهم
فماذا سيحدث لو كان بيديله اعانة
ولا صدقة ولا هبه ؟ المصري بيشتغل وبياخد اقل من حقة مش بيشحت عشان يتهان ويتمارس ضده كل اساليب القهر وتظهر مركبات النقص والشبعه بعد جوع
شكرا لابدائك الراي والمشاركة
islamventura
اهلا بيك وتشرفت بزيارتك الاولى للمدونة
فعلا كل شئ فى مصر ممكن واحيانا الحكومة البتخلية ممكن وكتير بيقوم افراد الشعب بواجب الضيافة ويقدم للسائح ما يريد مهما كان ضد سمعه بلده او ضد كل الاعراف والقوانين
مين الهرب القطري؟ ومين البيبيع شرفة؟
ومين الفاتح بيوته لاى نشاط يقوم بية الاخوة الزائرين العرب؟
فى غياب الضمير كل شئ يباع ويشتري
والفقر والجهل اساس كل فساد
شكرا لمرورك ومشاركتك
smraa alnil
اهلا سمورتي نورتيني
احنا ملناش كرامة لا جوا ولا بره
بس نبدا منين ونحاسب مين هنا المشكلة
نقول الحكومة هي السبب
تقولك منا فى سنة من السنين
وقفت تعاقدات المدرسين المصريين
الا لما يكون الراتب مجزي لقينا المصريين
بيتعاقدوا من خلال السفارات مباشرتا
دون الرجوع لوزارة القوي العاملة
يعني بعض الناس اهم يستاهلوا المهانة
لكن فى القضية الراح ضحيتها طفلة
ياتري فعلا ممكن يحاسبوا الكلب ولا صاحبة؟ولا مفيش فرق بين الاتنين
نورتيني يا بنوتة وسعدت بتواجدك
مصر هى أمى
انا فعلا شفت البوست التانى
بتاع الاخوان وتابعت الحوارات
ومعجبة جدا بالافكار البتتولد نتيجة
حسن ادارتك للحوار وضبط اسلوب الاخرين
بوست الاخوان 1و2 امتازوا بالشفافية والحياديه فى تناول الافكار والاراء
سعيدة بهذا الفكر البناء
تقبل ارق تحياتي
MAKSOFA
الله يسلمك عزيزتي مكسوفة
الناس فى مصر غلبانة اوى وبتضطر
لاستحمال اى شئ عشان خاطر تصرف على بيوتها وتربي اولادها وتصرف عليهم
لو مكنش فية فساد وسرقة ونهب فى مصر
كان كل مصري قدر يعيش فى بلده معزز مكرم ومكنش اضطر للغربة وكسرة النفس
تشرفت بمرورك وتعليقك الجميل
علي فكرة الموضوع المرة جامد و بجد اثر فيا اوي , بس المشكلة دلوقتي ان المصري بقي ارخص حتي من الكلب ، و علي فكرة بقي حال البلد دي مش هايتصلح الا لما الناس يتعدل حالها ، تفوق لروحها شوية و تعرف اللي بيحصل في الكواليس من ورا ضهرها ، لان الاعمي ما بيعرفش يروح في حته الا لما حد يسحبه ، و احنا حكومتنا عاميانا بالتعتيم الاعلامي و اخفاء اللي بيحصل علينا ،احنا اتعلمنا اننا نطاطي و نهين كرامتنا عشان لقمة العيش ، طب و هو ده عيش؟؟؟ الشعب اللي مالوش كرامة مالوش حقوق
انا مش قادر اكتب اقدر من كدة لان انا متنرفز و متعصب جدا
اسف علي التطويل
مش بيدفع كتير
يبقى اشطة
و في داهية الناس
ادخل عندى ضرورى جدا وانصر الطلبه المفصولينhttps://www.fnangeology.blogspot.com/
وسلااااام
elmanfada
سعدت بمشاركتك معنا والتعليق
لما بمشي فى الشارع واشوف الناس كتيرة
اقول يا ترى الناس الوشها بائس دي
بتفكر فى اية اهم بالنسبة لها
واية هي اولوياتها هل لقمة العيش
ولا كرامتها وكبريائها وصورة بلدها
الحكومة قدرت تحويلنا الى قطيع من الغنم
همنا كلة السعي وراء الكلأ والخوف من الذئب وليس بوسعنا محاربتة فقط الاختباء منة
Sharm
اى حد الفلوس معاه بدون تعب
حيدفع كتير وهو الامير دا جاب فلوسة الكتير منين ؟ ما هو برضة من حقوق الشعب السعودي الفرحان ب4آلاف ريال
نظير قعدتة على كرسي فى مكتب
بينما امرائه بياخدوا بالملايين
دون وجه حق سوي لانهم ولدوا فى اسرة
اغتصبت ارض شبة الجزيرة واطلقت عليها
اسم جدهم الاكبر الانتصر على باقي
القبائل بالحرب برضة مش بالتسليم
لديمقراطيتة وجدارتة وعدالتة لتولى
المنصب.. شكرا لتواصلك
fnan_geology
شكرا لتشريفك المدونة
ارق تحياتي للجميع
العائلات الملكيةالسعودية ؛ العار الذي لا يغسله أي شيء ما تتحدثين عنه حدث مثله و أكثر في قصرها على شاطئ أكادير و لم يلمهم أحد من القصر الملكي المغربي، لأنهم يدفعون ما يعتقدون أنه يغسل عارهم ؛ على شكل مساعدات لبناء المساجد و المكتبات؛ يذللنا بعهرهم و يرمون لنا لقاء كل ليلة جنسية بقشيشا
السلام عليكم ورحمة الله وبركاته اولا..
دى اول زيارة ليا لمدونتك الكريمة وعشان كدا هكون خفيف الى حد ما لكن بعد كدا بأمر الله هقولك انا شايف ايه بجد بكل وضوح وبدون ادنى مواراه لأى شىء, موضوع فعلا يشغل عقل المحبين لمصر بجد لكن.. هل إحنا نقدر نقول للسعوديين دول بم واحنا بندوس على كرامتنا بالشبشب عشان خاطر الكام ريال المصدى بتاعهم ؟؟..
محال بجد يقدروا يعملوا كدا, لكن صدقينى يا زعريمة, الإنحلال هنا وهناك وفى كل حتة فى العالم كله, وكل انسان هيتحاسب وربنا هيحاسبه على كل شىء سواء كان صغير او كبير, بجد انا مش مضايق اوى من اللى بيحصل منهم قد ما مضايق إننا احنا يا مصريين اللى سمحنلهم بدا, حاجه تكسف مش كدا ؟
ربنا يهديهم ويهدينا قبليهم وصدقينى يا زعيمة,لازم نكون اكبر وعى وادراك من دا ونكبر دماغنا عنهم لأنهم ولا حاجه, ونفكر بجد فى شىء مهم جدا ..
( ازاى ننهض بمصر )
فكرى معايا وقولى بجد رأيك ايه ؟
تحياتى
tazart عزيزتي
وهل يغسل العهر والرزيلة
بناء المساجد والمكتبات!!
الله طيب لا يتقبل الا الطيب
والانفاق فى سبيل الله يجب ان يكون
من المتقين لا الاشقياء المذنبين
أفمن اسس بنيانه علي تقوي من الله ورضوان خير أمن أسس بنينه علي شفا جرفٍ هارٍ فانهار به في نار جهنم
والله لا يهدي القوم الظلمين)
صدق الله العظيم
سورة التوبة الآية 108
شكرا لمرورك عزيزتي
وتقبلي ارق التحية
تعتعة أزهرى
وعليكم السلام ورحمة الله وبركاتة
اهلا بك وتشرفت المدونة بمرورك
اتفق معك ان الانحلال موجود فى كل مكان
ولكن على الاقل عندما تكون على ارضك
ان لا تهان ولا يمزق كبريائك وكرامتك
وتتسال كيف ننهض بمصر؟
اقول لك يا اخى الكريم
لكي تنهض بمكان لا بد اولا ان نعطي
للناس حقوقهم فية وعلى ارضة
حتي يستطيعوا القيام بواجباتهم
التى سيكون اولها النهوض بالوطن
سعدت بتشريفك واتمنى تجدد الزيارة
ارق تحياتي واطيب الامنيات
الحكومة لا تحترم الشعب وتضربه بالجزمة يبقى الكلاب اللى زى ترك بفلوسها هتضربنا بالجزمة لأنها شاريا المسئوةلين بفلوسها لازم نتحرر من الديكتاتور الأكبر وبعد كده كله هيبقى صح
أرجو زيارة مدونتى كراكيب مصرية
http://www.krakeb.blogspot.com/
Post a Comment
<< Home